人神共憤

以為唐英年已經夠無恥，點知曾蔭權更加卑劣下流。唐話晒有錢仔見慣酒池肉林，但係曾平民出身唔等於有藉口受唔住引誘喎，雖然不嬲知佢縮骨蠱惑，不過真係冇諗過佢抵死成咁。

看官，這一回，有分教：品德操守幾錢斤？豪食喪玩至過癮！

唔知曾生享用私人飛機遊艇盛宴賭局如畫風光之旅遊勝地及即將入住超豪巨宅，出賣咗幾多香港人利益呢？咪傻啦唔係以為人地當你係friend先對你咁好收你咁筍價錢招呼你賢伉儷呀……sorry講錯，咪當我地傻啦以為人地當你係friend呀……

唐郭妤淺，還有幾分可憐她。曾鮑笑薇？嘿！老公貪來的物事，跟出跟入一齊嘆，理直氣壯，理所當然，唯有贈你一句：衰格！女人都有品，好老婆會勸老公唔好行差踏錯，拉佢返轉頭。唔好扮女人仔話自己乜都唔識呀，匿埋老公背後咋唔關我事呀。扁嫂尚有股狠勁，曾太……自己certified啦。

煲呔精甩辮，睇死大家冇真憑實據捉唔到佢痛腳，大條道理「我有畀錢」，你咬我食呀，而家可能掩住半邊嘴笑緊唐唐擺明僭建犯法咁死蠢。如此特首，唔怪得香港咁多年都冇運行。真係家門不幸，人神共憤！