荒謬的思維

高官商人行賄貪污，年紀老邁要坐監，面對誘惑難以抗拒，係「人之常情」，值得體諒；佔領街道離晒譜，阻人搵食真不該，最好清場拉晒佢地。

究竟官員貪贓枉法為禍大，定係市民佔路乞人憎？

拉到一個許仕仁，不過冰山一角，成班「社會精英」私相授受，霸佔社會上層，結黨營私，總之自己人，公職油水位就有偈傾，政策工程大白象預埋你一份。利益來自每日民生消耗、衣食住行、公用事業和服務。

佔領期間，有的士司機話路面、隧道暢通咗，錢都賺多咗；有駕駛人士發現某些燈位被調整，停紅燈耐咗，無端端多咗好多不必要路障，懷疑政府製造塞車假像，屈佔領阻街；樓市股市（滬港通前）有升無跌。佔領造成經濟損失？無證據。

政府腐爛若此，社會扭曲若此，至少還有貪曾、貪湯、貪梁尚未查辦。許仕仁入獄，正好慢慢反省自己的錯，搞成咁都只係坐七年半，嘔返千零萬啫。做官特別出色？不見得，大家唔記得強積金之父令全民怨聲四起咩，辛苦血汗錢益晒班基金佬，蝕死班打工仔，and yet, he's well paid for it，應該要對得住個個月三十幾萬嗰份糧，香港人對佢冇要求過份啩。

公民抗命冀圖改革社會，修正制度，先從真普選做起，理應嘉許。

中國人長期被荒謬的思維和偽命題佔據腦袋，大人物犯錯就同情包容，無權無勢小市民抗爭就責難；或者奇怪地雙重標準，不按具體是非判斷事情；又或者一句：「係咁㗎啦」便繼續埋頭搵食，做生做死，僅僅唔夠皮，被剝削還怨自己唔夠搏命。難怪幾千年進步不了、正常不了。

對就是對，錯就是錯，年老的壞人，都是壞人，一切咎由自取。